ലണ്ടൻ:സോഷ്യൽ മീഡിയയിൽ ഉയരുന്ന വിമർശനങ്ങൾക്കു പിന്നാലെ പോയിരുന്നെങ്കിൽ ജീവിതത്തിൽ മുന്നോട്ടുപോകാൻ പോലും കഴിയുമായിരുന്നില്ലെന്ന് ബോളിവുഡ് താരം കത്രീന കൈഫ്. ഓരോ വിമർശനവും തന്റെ പ്രവർത്തനങ്ങളെ നിയന്ത്രിക്കാൻ അനുവദിച്ചിരുന്നെങ്കിൽ ഭയം കാരണം തളർന്നുപോകുമായിരുന്നുവെന്നും താരം പറഞ്ഞു. ലണ്ടനിൽ തന്റെ ബ്യൂട്ടി ബ്രാൻഡായ കൈ ബ്യൂട്ടിയുടെ പരിപാടിയിൽ സംസാരിക്കുകയായിരുന്നു കത്രീന.
സോഷ്യൽ മീഡിയയിലെ അഭിപ്രായങ്ങൾ ഒരാളുടെ ആത്മമൂല്യത്തെയും ആത്മവിശ്വാസത്തെയും ബാധിക്കുന്ന സാഹചര്യം ഒഴിവാക്കണമെന്ന് കത്രീന പറഞ്ഞു. എല്ലാവരെയും തൃപ്തിപ്പെടുത്താൻ ശ്രമിക്കുന്നത് സ്വന്തം തീരുമാനങ്ങൾ സ്വതന്ത്രമായി എടുക്കാനുള്ള കഴിവിനെ ബാധിക്കുമെന്നും താരം ചൂണ്ടിക്കാട്ടി.“ഓരോ തവണയും വിമർശനങ്ങളോ കമന്റുകളോ വരുമ്പോൾ അതിനനുസരിച്ച് എന്റെ പ്രവർത്തനങ്ങൾ മാറ്റിയിരുന്നെങ്കിൽ ഭയം കാരണം ഞാൻ തളർന്നുപോകുമായിരുന്നു. ജീവിതത്തിൽ മുന്നോട്ടുപോകാൻ പോലും കഴിയുമായിരുന്നില്ല,” എന്നായിരുന്നു കത്രീനയുടെ വാക്കുകളുടെ സാരം.
ജീവിതത്തിലെ ഓരോ ഘട്ടത്തിലും ഒരാളുടെ ആത്മവിശ്വാസത്തിലും കാഴ്ചപ്പാടുകളിലും മാറ്റങ്ങളുണ്ടാകാം. ചില സമയങ്ങളിൽ എല്ലാം മികച്ച രീതിയിൽ ചെയ്യാൻ കഴിയുന്നുവെന്ന് തോന്നും. മറ്റു ചിലപ്പോൾ ഒന്നും ശരിയാകുന്നില്ലെന്നും തോന്നാം. ഈ മാറ്റങ്ങളെ സ്വാഭാവികമായി സ്വീകരിക്കണമെന്നും കത്രീന പറഞ്ഞു.തന്റെ ബ്യൂട്ടി ബ്രാൻഡായ കൈ ബ്യൂട്ടിയുടെ ടാഗ്‌ലൈനായ ‘It’s K to be you’ എന്ന ആശയവും ഇതുതന്നെയാണെന്ന് താരം വ്യക്തമാക്കി. മറ്റുള്ളവരുടെ പ്രതീക്ഷകൾക്കനുസരിച്ച് ജീവിക്കുന്നതിനുപകരം, ഓരോ ഘട്ടത്തിലും സ്വന്തം വ്യക്തിത്വത്തെ അംഗീകരിക്കുകയാണ് വേണ്ടതെന്നും കത്രീന ഓർമിപ്പിച്ചു.
2025 നവംബറിൽ മകന്റെ അമ്മയായ കത്രീന, ഭർത്താവും നടനുമായ വിക്കി കൗശലിനൊപ്പം മുംബൈയിൽ നടന്ന അംബാനി കുടുംബത്തിന്റെ ഗണേശ ചതുർഥി ആഘോഷത്തിൽ പങ്കെടുത്തിരുന്നു. ഇതിനു പിന്നാലെ താരത്തിന്റെ ശരീരഭാരത്തെയും പ്രസവശേഷമുള്ള രൂപത്തെയും കുറിച്ച് സോഷ്യൽ മീഡിയയിൽ ചിലർ വിമർശനങ്ങളുയർത്തി.എന്നാൽ ഇത്തരം പരിഹാസങ്ങൾക്കെതിരെ നിരവധി ആരാധകർ രംഗത്തെത്തി. പ്രസവശേഷം സ്ത്രീകളുടെ ശരീരത്തിലുണ്ടാകുന്ന മാറ്റങ്ങളെ പരിഹസിക്കുന്നത് ശരിയല്ലെന്നായിരുന്നു പലരുടെയും പ്രതികരണം.
കത്രീന നേരിട്ട പരിഹാസങ്ങൾക്കിടെ നടൻ സൽമാൻ ഖാനും പ്രസവശേഷം ശരീരഭാരം കൂടുന്ന സ്ത്രീകളെ വിമർശിക്കുന്ന പ്രവണതയ്‌ക്കെതിരെ പ്രതികരിച്ചിരുന്നു. ‘ബിഗ് ബോസ് 20’യുടെ വാരാന്ത്യ എപ്പിസോഡിൽ സംസാരിക്കവെ, ഗർഭധാരണത്തിനും പ്രസവത്തിനും ശേഷം സ്ത്രീകളുടെ ശരീരത്തിൽ മാറ്റങ്ങളുണ്ടാകുന്നത് സ്വാഭാവികമാണെന്ന് അദ്ദേഹം ചൂണ്ടിക്കാട്ടി.പ്രസവശേഷം സ്ത്രീകൾക്ക് കുടുംബത്തോടൊപ്പം സമയം ചെലവഴിക്കാനുള്ള അവസരം നൽകണമെന്നും വീണ്ടും സിനിമയിൽ സജീവമാകുമ്പോൾ അവർ പഴയ ശരീരഘടനയിലേക്ക് മടങ്ങിയെത്തുമെന്നും സൽമാൻ അഭിപ്രായപ്പെട്ടു.ശരീരഭാരത്തിന്റെയോ രൂപത്തിന്റെയോ പേരിൽ സ്ത്രീകളെ അപമാനിക്കുന്ന സോഷ്യൽ മീഡിയ പ്രവണത വീണ്ടും ചർച്ചയാകുന്നതിനിടെയാണ് കത്രീനയുടെ പ്രതികരണം ശ്രദ്ധ നേടുന്നത്.
