ലോക ഫുട്ബോൾ ഇതിഹാസം ലയണൽ മെസ്സിയെ കേരളത്തിന്റെ മണ്ണിലെത്തിക്കുമെന്ന് വീമ്പിളക്കി മലയാളികളുടെ കാൽപ്പന്ത് വികാരത്തെ ചൂഷണം ചെയ്ത സംഭവത്തിൽ ഒടുവിൽ ഞെട്ടിക്കുന്ന സത്യങ്ങൾ പുറത്തുവരികയാണ്. കായികപ്രേമികളുടെ ആവേശത്തെ മുൻനിർത്തി കോടികൾ തട്ടിയെടുത്ത വമ്പൻ ഗൂഢാലോചനയിൽ വൻ സ്രാവുകൾ തന്നെയാണ് ഇപ്പോൾ കുടുങ്ങിയിരിക്കുന്നത്. മുൻ കായികമന്ത്രി വി. അബ്ദുറഹിമാനെ ഒന്നാം പ്രതിയാക്കി അഴിമതി നിരോധന നിയമപ്രകാരം കേസ് എടുക്കാൻ ഡി.ജി.പി റവാഡ ചന്ദ്രശേഖർ സർക്കാരിന്റെ അടിയന്തര അനുമതി തേടിയതോടെ കേരള രാഷ്ട്രീയം വലിയൊരു ഭൂകമ്പത്തിനാണ് സാക്ഷ്യം വഹിക്കുന്നത്. എ.ഡി.ജി.പി പി. വിജയന്റെ നേതൃത്വത്തിലുള്ള പ്രത്യേക അന്വേഷണസംഘം നൽകിയ ശുപാർശയുടെ അടിസ്ഥാനത്തിലാണ് ഡി.ജി.പിയുടെ ഈ നിർണ്ണായക നീക്കം.
മുൻ കായികമന്ത്രിയെ മാത്രമല്ല ഈ കേസിൽ പ്രതി ചേർക്കുന്നത്. അദ്ദേഹത്തിന്റെ പ്രൈവറ്റ് സെക്രട്ടറിയായിരുന്ന സി. സത്യപാലൻ, സ്പോർട്സ് കൗൺസിൽ മുൻ പ്രസിഡന്റും മുൻ അന്താരാഷ്ട്ര ഫുട്ബോൾ താരവുമായ യു. ഷറഫലി, ൻ ആന്റോ അഗസ്റ്റിൻ, റിപ്പോർട്ടർ ബ്രോഡ്കാസ്റ്റിംഗ് കോർപ്പറേഷൻ എന്നിവരെയും കേസിൽ പ്രതിപ്പട്ടികയിൽ ഉൾപ്പെടുത്താൻ അന്വേഷണസംഘം തീരുമാനിച്ചു കഴിഞ്ഞു. ഭരണത്തലപ്പത്തുള്ളവരും ഉന്നത ഉദ്യോഗസ്ഥരും സ്വകാര്യ വ്യക്തികളും ചേർന്ന് നടത്തിയ തികച്ചും ആസൂത്രിതമായ ഗൂഢാലോചനയും ചതിയും ഔദ്യോഗിക പദവി ദുരുപയോഗം ചെയ്യലുമാണ് അന്വേഷണത്തിൽ പൂർണ്ണമായി തെളിഞ്ഞിരിക്കുന്നത്.
ഇവിടെ പോലീസ് അന്വേഷണം കൊണ്ടുമാത്രം കാര്യങ്ങൾ അവസാനിക്കുന്നില്ല എന്നതാണ് ഏറ്റവും ശ്രദ്ധേയമായ മറ്റൊരു വസ്തുത. ഈ മഹാതട്ടിപ്പിലേക്ക് സാമ്പത്തിക കുറ്റകൃത്യങ്ങൾ അന്വേഷിക്കുന്ന എൻഫോഴ്സ്മെന്റ് ഡയറക്ടറേറ്റും ഉടൻ തന്നെ രംഗത്തിറങ്ങുകയാണ്. ഒരു സ്വകാര്യ കമ്പനിയുടെ വിപണിമൂല്യം കൃത്രിമമായി ഉയർത്താനും, അതിന്റെ മറവിൽ കള്ളപ്പണം വെളുപ്പിക്കാനും ബോധപൂർവ്വമായ ശ്രമം നടന്നുവെന്നാണ് ലഭ്യമാകുന്ന വിവരങ്ങൾ. യാതൊരുവിധ സാമ്പത്തിക സ്രോതസ്സോ വിശ്വാസ്യതയോ പരിശോധിക്കാതെ ഒരു സ്വകാര്യ കമ്പനിക്ക് സർക്കാർ സംവിധാനങ്ങൾ വിട്ടുകൊടുത്തതും, പ്രമുഖ ധനകാര്യ സ്ഥാപനങ്ങളിൽ നിന്ന് കോടികൾ സമാഹരിച്ചതിലെ ദുരൂഹ ഇടപാടുകളും എൻഫോഴ്സ്മെന്റ് ഡയറക്ടറേറ്റ് ആഴത്തിൽ പരിശോധിക്കും.
കേരളത്തിലെ മുഴുവൻ നിയമങ്ങളെയും ഭരണചട്ടങ്ങളെയും പരസ്യമായി കാറ്റിൽപ്പറത്തിക്കൊണ്ടാണ് ഈ കപടനാടകം അരങ്ങേറിയതെന്ന് അന്വേഷണസംഘം വ്യക്തമാക്കുന്നുണ്ട്. സ്പോർട്സ് വകുപ്പുമായി ഔദ്യോഗികമായ ഏതെങ്കിലും കരാറുകൾ രൂപപ്പെടുന്നതിന് എത്രയോ മുൻപേ തന്നെ റിപ്പോർട്ടർ ബ്രോഡ്കാസ്റ്റിംഗ് കമ്പനി അർജന്റീന ഫുട്ബോൾ അസോസിയേഷനുമായി നേരിട്ട് കരാറുണ്ടാക്കുകയാണുണ്ടായത്. പരസ്യ ടെൻഡറുകളോ താല്പര്യപത്രങ്ങളോ ഒന്നും തന്നെ ക്ഷണിക്കാതെ, മന്ത്രിയുടെ വാക്കാലുള്ള നിർദ്ദേശത്തിന്റെ മാത്രം ധൈര്യത്തിലാണ് മന്ത്രിസഭയെയും ബന്ധപ്പെട്ട വകുപ്പിനെയും പാടെ അവഗണിച്ച് ഈ അവിശുദ്ധ കൂട്ടുകെട്ട് പച്ചപിടിച്ചത്.
ഔദ്യോഗിക സംവിധാനങ്ങളെയും അധികാര കസേരകളെയും മറയാക്കിക്കൊണ്ട് രണ്ട് പ്രമുഖ ധനകാര്യ സ്ഥാപനങ്ങളിൽ നിന്നായി ഈ സംഘം വെട്ടിച്ചത് ഒന്നും രണ്ടുമല്ല, ഇരുനൂറ്റി ആറ് കോടി രൂപയാണ്. സ്പോർട്സ് കൗൺസിൽ പ്രസിഡന്റ് എന്ന ഔദ്യോഗിക പദവി മുൻനിർത്തിയാണ് ഷറഫലി വിവാദ കരാറിൽ ഒപ്പുവെച്ചത്. മന്ത്രി പറഞ്ഞതുകൊണ്ട് മാത്രമാണ് താൻ സാക്ഷിയായി ഒപ്പിട്ടതെന്ന് ഷറഫലി അന്വേഷണസംഘത്തിന് മുൻപാകെ മൊഴി നൽകിയിട്ടുണ്ടെങ്കിലും, ഔദ്യോഗിക പദവി ദുരുപയോഗം ചെയ്തതിൽ ഷറഫലിക്കും തുല്യപങ്കുണ്ടെന്നാണ് പ്രത്യേക അന്വേഷണസംഘം അസന്നിഗ്ദ്ധമായി ചൂണ്ടിക്കാണിക്കുന്നത്.
ലയണൽ മെസ്സിയെ കേരളത്തിലേക്ക് കൊണ്ടുവരാൻ ക്ഷണിക്കാനെന്ന വ്യാജേന 2024-ൽ മന്ത്രിയുടെ നേതൃത്വത്തിൽ സ്പെയിനിലേക്ക് നടത്തിയ ഉല്ലാസയാത്രയ്ക്ക് ചിലവാക്കിയത് പതിമൂന്ന് ലക്ഷത്തിലധികം രൂപയുടെ പൊതുപണമാണ്. അന്ന് വകുപ്പ് സെക്രട്ടറിയെപ്പോലുള്ള ഉയർന്ന ഉദ്യോഗസ്ഥരെപ്പോലും പൂർണ്ണമായും ഇരുട്ടിൽ നിർത്തിക്കൊണ്ട് മുൻ മന്ത്രി അബ്ദുറഹിമാൻ തന്റെ സ്വകാര്യ ഇ-മെയിൽ വഴിയാണ് അർജന്റീന ഫുട്ബോൾ അസോസിയേഷനുമായി ആശയവിനിമയം നടത്തിയത്. മന്ത്രിയുടെ പ്രൈവറ്റ് സെക്രട്ടറി വഴി മാത്രമാണ് വകുപ്പിലേക്ക് ഇത്തരം അനധികൃത ഇടപാടുകൾക്കുള്ള നിർദ്ദേശങ്ങൾ ചെന്നെത്തിയിരുന്നത്.
വിവാദം കത്താൻ തുടങ്ങിയതോടെ തങ്ങളുടെ കള്ളത്തരങ്ങൾ പുറത്തുവരുമെന്ന് ഭയന്ന് സ്പോർട്സ് കൗൺസിലും സർക്കാരും തമ്മിലുണ്ടാക്കിയ രേഖകൾ ഓഫീസുകളിൽ നിന്ന് തന്നെ രഹസ്യമായി മുക്കിയതായും അന്വേഷണത്തിൽ ബോധ്യപ്പെട്ടിട്ടുണ്ട്. തട്ടിപ്പിന്റെ യഥാർത്ഥ വ്യാപ്തി പുറംലോകമറിയാതെ മൂടിവെക്കാനും തെളിവുകൾ ഇല്ലാതാക്കാനുമുള്ള ആസൂത്രിത നീക്കമായിരുന്നു ഇത്. കളമശ്ശേരി പോലീസ് രജിസ്റ്റർ ചെയ്ത കേസിൽ അഴിമതി നിരോധന നിയമത്തിലെ കർശന വകുപ്പുകൾ കൂടി ഉൾപ്പെടുത്താനാണ് ഇപ്പോൾ എസ്.ഐ.ടി നീങ്ങുന്നത്. സർക്കാരിന്റെയും ജനങ്ങളുടെയും സംവിധാനങ്ങളെ ഒരു സ്വകാര്യ ചാനൽ കമ്പനിയുടെ വാണിജ്യ വളർച്ചയ്ക്കായി അടിയറവു വെച്ചതാണ് ഈ കേസിനെ ഇത്രയധികം ഭയാനകമാക്കുന്നത്.
ഫുട്ബോളിനെ ജീവശ്വാസമായി കാണുന്ന മലയാളി കായികപ്രേമികളുടെ വികാരം വിറ്റ് കാശാക്കാൻ കൂട്ടുനിന്ന ഭരണാധികാരികളുടെ പതനമാണ് നാം ഇവിടെ കാണുന്നത്. സർക്കാരിൽ നിന്ന് ഔദ്യോഗിക അനുമതി ലഭിക്കുന്നതോടെ മുൻ മന്ത്രിയുടെ അറസ്റ്റിലേക്ക് കാര്യങ്ങൾ നീങ്ങുമെന്നത് ഉറപ്പാണ്. ഇ.ഡി കൂടി പ്രവേശിക്കുന്നതോടെ കള്ളപ്പണം വെളുപ്പിക്കൽ നിരോധന നിയമപ്രകാരമുള്ള അതീവ കർശന നടപടികൾ വരുംദിവസങ്ങളിൽ കേരളം കാണേണ്ടി വരും. ജനങ്ങളുടെ നികുതിപ്പണം വെട്ടിച്ച് ആർഭാടം കാണിക്കുകയും നാടിന് വലിയ അപമാനം വരുത്തിവെക്കുകയും ചെയ്ത ഈ വൻ സ്രാവുകൾ എങ്ങോട്ട് രക്ഷപ്പെടുമെന്ന് കണ്ടുതന്നെ അറിയണം. കൂടുതൽ വിവരങ്ങൾക്കായി കാത്തിരിക്കാം.
