പ്രശസ്ത കെ-പോപ്പ് ബോയ് ബാൻഡായ സ്ട്രേ കിഡ്സും (Stray Kids) ഗ്രാമി പുരസ്കാര നാമനിർദ്ദേശങ്ങളിൽ നിന്ന് വിട്ടുനിൽക്കുമെന്ന് പ്രഖ്യാപിച്ചു. 2027-ലെ ഗ്രാമി അവാർഡുകൾക്കായി യാതൊരുവിധ എൻട്രികളും സമർപ്പിച്ചിട്ടില്ലെന്ന് ബാൻഡിന്റെ ഉടമസ്ഥരായ ജെവൈപി എന്റർടൈൻമെന്റ് കഴിഞ്ഞ ദിവസം ഔദ്യോഗികമായി സ്ഥിരീകരിച്ചു. ഗ്രാമിയിൽ പുതിയതായി ഉൾപ്പെടുത്തിയ ‘മികച്ച ഏഷ്യൻ പോപ്പ് മ്യൂസിക് പെർഫോമൻസ്’എന്ന വിഭാഗത്തിനെതിരെ ഇതിനകം പ്രതിഷേധമുയർത്തിയിട്ടുള്ള ബിടിഎസിനൊപ്പമാണ് ഇപ്പോൾ സ്ട്രേ കിഡ്സും അണിനിരന്നിരിക്കുന്നത്.
ഭാഷയുടെയും പ്രദേശത്തിന്റെയും അടിസ്ഥാനത്തിൽ സംഗീതത്തെ വേർതിരിക്കുന്നതിനെതിരെ ജൂലൈ മാസത്തിൽ ബിടിഎസ് തങ്ങളുടെ ബഹിഷ്കരണ പ്രഖ്യാപനം നടത്തിയിരുന്നു. ബിൽബോർഡ് 200 ചാർട്ടിൽ ഒന്നാം സ്ഥാനം നേടിയ ‘അരിരാംഗ്’ പോലുള്ള വലിയ വിജയങ്ങൾ ഉണ്ടായിട്ടും ബിടിഎസ് ഗ്രാമിയിൽ പങ്കെടുക്കേണ്ടതില്ലെന്ന് തീരുമാനിക്കുകയായിരുന്നു. ഈ മാതൃക പിന്തുടർന്നാണ് സ്ട്രേ കിഡ്സും ഈ വർഷത്തെ ഗ്രാമി പരിഗണനകളിൽ നിന്ന് വിട്ടുനിൽക്കാൻ തീരുമാനിച്ചിരിക്കുന്നത്. എട്ട് അംഗങ്ങളുള്ള സ്ട്രേ കിഡ്സിന്റെ ഭാഗത്തുനിന്ന് ഔദ്യോഗിക കാരണങ്ങൾ വിശദീകരിച്ചിട്ടില്ലെങ്കിലും, ഈ പുതിയ വിഭാഗത്തിലുള്ള എതിർപ്പാണ് ബഹിഷ്കരണത്തിന് കാരണമെന്ന് വ്യക്തമാണ്.
ഏഷ്യൻ സംഗീത ലോകത്തിന്റെ ആഴവും വൈവിധ്യവും ലോകത്തിന് മുന്നിൽ അവതരിപ്പിക്കാനാണ് പുതിയ വിഭാഗം കൊണ്ടുവന്നതെന്നാണ് ഗ്രാമി അക്കാദമി സിഇഒ ഹാർവി മേസൻ ജൂനിയർ ഇതിന് മറുപടിയായി വ്യക്തമാക്കിയത്. എന്നാൽ ഏഷ്യൻ സംഗീത രംഗത്തെ പ്രമുഖരുമായി നടത്തിയ ചർച്ചകൾക്ക് ഒടുവിലും ഈ വിഭാഗവുമായി മുന്നോട്ട് പോകാൻ തന്നെയാണ് അക്കാദമിയുടെ തീരുമാനം. അതേസമയം, ഗ്രാമി അംഗീകാരങ്ങൾ ഇല്ലെങ്കിലും കഴിഞ്ഞ നവംബറിൽ പുറത്തിറങ്ങിയ ‘ഡു ഇറ്റ്’ (DO IT), ഓഗസ്റ്റിലെ ‘ദിസ് & ദാറ്റ്’ (THIS & THAT) തുടങ്ങിയ ആൽബങ്ങളിലൂടെ ബിൽബോർഡ് ചാർട്ടുകളിൽ വലിയ മുന്നേറ്റം നടത്താൻ സ്ട്രേ കിഡ്സിന് സാധിച്ചിട്ടുണ്ട്.
