പ്രമുഖ ശാസ്ത്രജ്ഞന്‍ ഫ്രാൻസിസ് ഹാൾസെന് ഇക്കൊല്ലത്തെ ഭൗതികശാസ്ത്രത്തിനുള്ള നൊബേൽ സമ്മാനം. ഐസ് ക്യൂബ് ന്യൂട്രിനോകൾക്ക് ഒബ്സർവേറ്ററിക്ക് നല്‍കിയ സംഭാവനകളും ഉയര്‍ന്ന ഊര്‍ജ്ജമുള്ള ന്യൂട്രിനോകളുടെ (neutrinos) കണ്ടെത്തലും മുന്‍നിര്‍ത്തിയാണ് ബഹുമതി. റോയൽ സ്വീഡിഷ് അക്കാദമി ഓഫ് സയൻസസ് ആണ് സ്റ്റോക്കോമില്‍ വെച്ച് പുരസ്‌കാരം പ്രഖ്യാപിച്ചത്. അസാധാരണമായ ശാസ്ത്രീയ കാഴ്ചപ്പാടിലൂടെ പുതിയൊരു ജ്യോതിശാസ്ത്ര ശാഖയ്ക്ക് തന്നെ അദ്ദേഹം അടിത്തറ പാകിയെന്ന് നൊബേൽ കമ്മിറ്റി ഫോർ ഫിസിക്സ് ചെയർമാൻ മാർക്ക് പിയേഴ്സ് അഭിനന്ദിച്ചു.
ബെൽജിയത്തിൽ ജനിച്ച 82 കാരനായ ഫ്രാൻസിസ് ഹാൾസെൻ അമേരിക്കയിലെ വിസ്കോൺസിൻ-മാഡിസൺ സർവകലാശാലയുമായി സഹകരിച്ച് പ്രവര്‍ത്തിച്ചുവരികയാണ്. ദക്ഷിണ ധ്രുവത്തിൽ ന്യൂട്രിനോകളെ കണ്ടെത്താനുള്ള അദ്ദേഹത്തിന്റെ ഗവേഷണങ്ങൾ 1980-കൾ മുതൽ ആരംഭിച്ചതാണ്.
ഇക്കൊല്ലത്തെ നൊബേൽ പ്രഖ്യാപനങ്ങള്‍ തിങ്കളാഴ്ച വൈദ്യശാസ്ത്ര പുരസ്‌കാരത്തോടെയാണ് ആരംഭിച്ചത്. തലച്ചോറിന്റെ പ്രവര്‍ത്തനം മനസ്സിലാക്കാന്‍ പ്രകാശം ഉപയോഗിക്കുന്ന ടൂള്‍ വികസിപ്പിച്ച മൂന്ന് ശാസ്ത്രജ്ഞര്‍ക്കാണ് വൈദ്യശാസ്ത്ര നൊബേല്‍ ലഭിച്ചത്. ബുധനാഴ്ച രസതന്ത്രത്തിനുള്ള പുരസ്കാരവും വ്യാഴാഴ്ച സാഹിത്യത്തിനുള്ള പുരസ്കാരവും പ്രഖ്യാപിക്കും. വെള്ളിയാഴ്ച സമാധാനത്തിനുള്ള നൊബേല്‍ സമ്മാനവും, തുടര്‍ന്ന് തിങ്കളാഴ്ച സാമ്പത്തികശാസ്ത്രത്തിനുള്ള നൊബേല്‍ പുരസ്കാരവും പ്രഖ്യാപിക്കുന്നതോടെ ഈ വര്‍ഷത്തെ നൊബേല്‍ പ്രഖ്യാപനങ്ങള്‍ക്ക് സമാപനമാകും.
