സ്റ്റോക്ക്‌ഹോം : ആഗോള സാമ്പത്തിക ആഘാതങ്ങളെയും പണപ്പെരുപ്പത്തെയും പ്രതിരോധിക്കാൻ സർക്കാരുകളെയും കേന്ദ്ര ബാങ്കുകളെയും സഹായിക്കുന്ന മാതൃകകൾ വികസിപ്പിച്ച അമേരിക്കൻ സാമ്പത്തിക
ശാസ്ത്രജ്ഞരായ റോബർട്ട് ഇ. ഹാൾ, മൈക്കൽ വുഡ്ഫോർഡ് എന്നിവർക്ക് ഈ വർഷത്തെ സാമ്പത്തിക ശാസ്ത്ര നൊബേൽ പുരസ്കാരം. സ്റ്റോക്ക്‌ഹോമിൽ റോയൽ സ്വീഡിഷ് അക്കാദമി ഓഫ് സയൻസസാണ് പുരസ്കാരം പ്രഖ്യാപിച്ചത്. സാമ്പത്തിക രംഗത്തെ അനിശ്ചിതത്വങ്ങളും ഉയർച്ച താഴ്ചകളും പരിഹരിക്കുന്നതിൽ ഇരുവർക്കും നിർണ്ണായക പങ്കുണ്ടെന്ന് അക്കാദമി വ്യക്തമാക്കി.
സ്റ്റാൻഫോർഡ് സർവകലാശാലയിലെ അധ്യാപകനാണ് റോബർട്ട് ഹാൾ. മൈക്കൽ വുഡ്ഫോർഡ് കൊളംബിയ സർവകലാശാലയിലാണ് സേവനമനുഷ്ഠിക്കുന്നത്. ആഗോളതലത്തിൽ കേന്ദ്ര ബാങ്കുകളും സർക്കാരുകളും നിലവിൽ പിന്തുടരുന്ന നയരൂപീകരണ മാതൃകകൾക്ക് ഉറച്ച സൈദ്ധാന്തിക അടിത്തറ നൽകാൻ ഇവരുടെ ഗവേഷണങ്ങൾക്ക് സാധിച്ചതായി പുരസ്കാര സമിതി അധ്യക്ഷൻ ജോൺ ഹാസ്‌ലർ ചൂണ്ടിക്കാട്ടി. ഊർജ്ജ പ്രതിസന്ധികൾ, ഉപഭോഗ ശീലങ്ങളിലെ മാറ്റങ്ങൾ തുടങ്ങിയ അപ്രതീക്ഷിത സാമ്പത്തിക വെല്ലുവിളികളെ നേരിടാൻ ഇത് ലോകരാജ്യങ്ങളെ പ്രാപ്തരാക്കി.
പരമ്പരാഗതമായി പിന്തുടർന്നുപോന്നിരുന്ന കെയിനീഷ്യൻ രീതികൾക്ക് പകരം ഉപഭോക്താക്കളുടെയും ബിസിനസുകളുടെയും യഥാർത്ഥ തീരുമാനങ്ങളെക്കൂടി ഉൾപ്പെടുത്തിയാണ് ഇരുവരും പുതിയ നയമാതൃകകൾ നിർമ്മിച്ചത്. 1970-കളിൽ ലോകം നേരിട്ട സാമ്പത്തിക മാന്ദ്യവും ഉയർന്ന പണപ്പെരുപ്പവും ഒന്നിച്ചുവന്ന ‘സ്റ്റാഗ്ഫ്ലേഷൻ’ സാഹചര്യത്തിൽ പഴയ സിദ്ധാന്തങ്ങൾ പരാജയപ്പെട്ടപ്പോഴാണ് ഹാളിന്റെയും വുഡ്ഫോർഡിന്റെയും പുതിയ രീതികൾ ശ്രദ്ധിക്കപ്പെട്ടത്.
ആൽഫ്രഡ് നൊബേലിന്റെ ഓർമ്മയ്ക്കായി സ്വീഡിഷ് സെൻട്രൽ ബാങ്ക് 1968-ൽ ഏർപ്പെടുത്തിയതാണ് ഈ പുരസ്കാരം. ഡിസംബർ 10-ന് നടക്കുന്ന ചടങ്ങിൽ 12 ദശലക്ഷം സ്വീഡിഷ് ക്രോണർ (ഏകദേശം 1.2 ദശലക്ഷം ഡോളർ) ഇരുവരും ചേർന്ന് ഏറ്റുവാങ്ങും.
